O Ateneo Ferrolán celebra o
vindeiro xoves 15 de outubro a partir das 17.00 horas, na súa sede da
rúa Magdalena, as II Xornadas de Documentación «Arquivos para a
cidadanía. Arquivos da cidadanía», presididas polo concelleiro
de Cultura de Ferrol Suso Basterrechea.
Os estereotipos tenden a amosar os arquivos como institucións
históricas adicadas ao estudo do pasado e á investigación. Máis
aló deste clixé, as xornadas queren poñer o énfase en como o
funcionamento dos arquivos ten directa repercusión no día a día
dos cidadáns en ámbitos tan cotiáns como a Sanidade ou a Xustiza,
por poñer só algúns exemplos.
O profesor Pedro López Gómez
imparte a conferencia inaugural. Pedro López
foi o primeiro vicedecano de Biblioteconomía da Facultade de
Humanidades. Na actualidade é profesor honorario da Universidade da
Coruña e presidente do padroado da Fundación Olga Gallego.
Pedro López incidirá na necesidade dunha boa organización
arquivística, fronte ás situacións habituais que atopan os
arquivos, desde a carencia de persoal e recursos materiais até ás
prácticas derivadas da aplicación das leis de segredos oficiais, de
transparencia, normas administrativas, que dificultan os dereitos de
acceso á información de cidadáns e xornalistas.
Pola súa banda Gaspar Domínguez, do SCQLab, afondará na
histórica relación dos arquivos co poder, indagando nas fórmulas
para invertir esta situación e poñer os arquivos ao servizo da
cidadanía.
Experiencias TIC
Finalmente, Manolo González e Carmen Suárez
presentarán o premiado proxecto «Fálame
de San Sadurniño». Onde unha experiencia de
alfabetización dixital transfórmase nun repositorio documental
colaborativo que arquiva, comparte e preserva para o futuro a memoria
colectiva dunha comunidade local.
As XornadasDOC, que son abertas ao público, finalizan cun
coloquio moderado por Fernando Rivera, responsable da
Biblioteca-Hemeroteca do Ateneo Ferrolán.
O contexto das XornadasDOC
As XornadasDOC do Ateneo Ferrolán celébranse con periodicidade
bienal e teñen entre os seus obxectivos dar visibilidade e comunicar
á sociedade a importancia do traballo que realizan os arquivos,
bibliotecas e centros de documentación. A primeira edición
celebrouse en 2013 e estivo adicada ás bibliotecas e arquivos
especializados en información local.
Máis información: